Улон, пе, со сыӵе.

Ми нырысетӥ семестрын мировой экономикаез дышетӥмы. Мыным дышетӥсь яраз. Со оло мар но улонысь маде вал милемлы. Аслэсьтыз пи сярысь ӵем вералляз: со, пе, Америкае кошкем, отын ужа Microsoft нимо компаниын. Мыным тунсыко потӥз, кызьы со отчы сюрем, нош дышетӥсьлэсь уд юа ук. Шӧдтэк шорысь со та сярысь ачиз мадиз. Кыӵе ке темая, дыр, тупа вал та информация, али уг тодӥськы ини.
Нырысь, пе, пиез огшоры программист луыса ужаз. Собере сое но эшшо кык солэсь эшъёссэ кин ке адӟем но Министерство информации (информация Министерство, озьы, дыр, шонер) лэсьтыны косэм. Соос лэсьтӥзы. Нош отын котькытын кадь бюрократия кылдӥз: маке куроно ке, трос документъёсты, бумагаосты дасяно кулэ луиз. И соос пытсазы Министерствозэ, соослы ӧз яра озьы солэн ужамез. Мон озьы валай, может мукетгес вал, та информация туж шонер ӧвэл. Собере соос сайт усьтӥллям, отын тунсыко малпамзылы улон сётӥзы. Магазинъёсын котьку кыӵе ке но скидкаос, акциос луо. Соосты адямиос сайт пыр учкыны быгатӥзы. Туж пайдаё. Огшоры адямиослы. Нош бизнесменъёслы одӥг гинэ вред вайиз. Огпол одӥгез программист больницае сюрем, пулевой ранениен. Озьыен соос сайтсэс но пытсазы. Али ужало Google, Microsoft но Касперский нимо компаниосын, ваньзы Россиысь кошкизы.
Мон малы тае гожтӥсько. Дышетӥсьлэн милемлы верамез потэ вал, что али ми улӥськом секыт дыре. Умой малпанъёслы, калык понна, туннэ улонэ секыт потыны.