Тылси

Туннэ базаре выль дӥськут понна мынӥ. Отын-татын ветлыса, адӟи книгаосын ӝажыосты. Ма та таӵе, библиотека усьтэм инбам улын-а мар-а малпаса, мынӥ учкыны.
Отын ужаз пересь воргорон. Со книгаосын вузкариз вылэм. Дышетскисьёслы, студентъёслы дуныз ичигес - мыным кык книга тямыстон манетэн луиз. Сыӵе дуныз ке, прибыль нокыӵе, дыр, уг басьты со, малпасько. Малы нош ужа соку?
Ку кышноез кулӥз, со вань аслэсьтыз книгаосты ӝуатыса кельтӥз. Огпол солы эшлэн пиез быдэс машина книга вайиз вить сюрс манетэн. Та воргорон вуиз базаре, татчы ӝажыосты вайиз но усьтӥз вузкаронзэ. Озьы та ужлэн кутсконэз луиз. Мукет адямиос но солы вуж книгаосты ваё. Пенсия ке ӧй луысал, со ӧз быгатысал ужаны. Нош али каллен-каллен выре. Та ужез гинэ лэсьтоно ке, куинь поллы тросгес книгаосты возёно, аренда но тросгес тыроно луоз. Куазь но люкетэ: зорлэсь но шундылэсь утёно.
Шуг-секытъёс вылэ учкытэк, та пересь воргорон ужа. Таӵе адямиос вань понна мон шумпотӥсько. Отчы одно ик выльысь вуо, эшъёсты но ваё.

Индиысь ярмарка

Контактысь иворъёс пӧлысь адӟи Индиысь Иже вуись вузкарисьёс сярысь ялонэз. Отчы студентъёсты ужаны утчало вал, индусъёслы юрттӥсь луыса. Мыным тунсыко потӥз та ужрад, но мон, эшъёсты ӧтьыса, малпай эскерыны. Нош нокинлэн ӧз пӧрмы (отын быдэс нунал ужано вал), соин огнам, кышканэз куштыса, мынӥ отчы.
Мон вуи куинетӥ ужан нуналаз гинэ, мкш дышетскон ӧз быры на вал. Пумитаз монэ нылаш, шуиз интыос, пе, ӧвэл ни. Нош ӧжытак вити но, инты мыным всё-таки шедиз. Отын трос лавкаос пӧртэм арбериосын сылӥзы.

 Сыӵе вывескаос вал.

Мон сюри дӥськутэн вузкарон интые. Отын ужазы кык нылъёс ини. Соос мыным ваньзэ мадизы, ма лэсьтыны. Мон ноку ӧй вузкары на, соин кызьы адямиосын вераськыны, ма карыны шуэктӥ. Кӧня ке синъёсын лопыръяса сылӥ но коллега мыным шуэ: "Озьы сылод ке, тонэ ӵуказе уз ӧте татчы. Толон нылашез уллязы тазьы ужамез понна, со бӧрдыса кошкиз." Тӥни малы мыным инты шедиз, малпасько. Кутски ма ке карыны. Озьыен нырысетӥ нунал быриз, коньдон басьтыса, бер пыдъёстэк вуи огъяулонние.
Ӵуказеяз Саня (Сани нимыз вал) монэ но эшшо одӥг нылашез келяз мукет Саня доры (Шану нимыз). Ярмарка котькуд нуналэ паськытгес кариськиз, выль лавкаосты усьязы. Оло со понна, оло ужаммы ӧз яра - но нырысетӥ интыысь ми кошким. Сюрим мукет дӥськут пӧлы. Татын со вуремын умойгес вал, соин мыным вераны адямиослы трос кылъёсты кулэлыкес ӧй вал ни, асьсэос адӟизы умойлыкес, выль кузё но ӟечгес - мылкыдо, капчи сюриз.
Куинетӥ нуналэ усьтӥзы эшшо одӥг лавка, пӧртэм овощерезкаосын. Мон мынӥ отчы. Табере эшшо выль кык кузёослы тросгес луиз. Овощерезкаосты басьяллязы ӧжытак гинэ, соос Россиын но вань шуыса, соин мукет нуналаз соосты ичиёмитызы но усьтӥзы дӥськутлэн кыкетӥ отдел. Вешалка понна мон кык пол фикс-прайс магазинэ бызьылӥ, вить пакетэн бертыса.
Ньылетӥ нуналаз уж умой мынӥз ни, мон дыши. Кӧня ке кылъёс хинди кылын дышетӥ но кузёосын вераськи, соос монэ али ик гажаны кутскизы, сиён но сётӥзы)) Паспорт визаосын но одӥгез возьматӥз, кытын гинэ со ӧй вал!

Мукетыз коньдонзэ возьматӥз, рупи нимаське. Махатма Гандиез тодмай - школаын историез токма ӧй дышеты.

Котькинлы ас кылыз дуно ук.

Мукет нуналэ мон дышетскыны кошки. Собере ужай на кык-куинь нунал. Нош сизьыметӥ инвожое, берпуметӥ выставка ужан нуналэ, мон басьяськыны вуи. Синъёс асьтана-пасьтана бызьызы, коньдон трос ке, отын быдэс нунал ветлыны луоз. Нош мон гуртэ пичильтык кузьымъёсты басьтӥ гинэ. 

Та ярмарка 29 куартолэзе кутскиз но 7 инвожое быриз. Та нуналъёс - Ижын гинэ ужамез, нош али вузкарисьёс эшшо Пермь каре кошкизы. Мон татын ужан дырез йырын возё быдэс улонме: нырысетӥ мукет элькунысь адямиосын вераськонэз, соослэсь культураен тодматскемез. Берпуметӥ нуналъёсы отысь кошкыса ульчаын индусъёсты адӟеме потэ вал, та атмосфера сюлэме пыриз.
Озьы мон Удмуртиысь кошкытэк ӧжыт Индиын улӥ)

Йыртэмпол

Эшъяськон юртын ортчиз Марина Пахомовалэн "Йыртэмпол" кылбур бичетлэн презентациез.
Отчы котьку таӵе ужрадъёсы кулэ пырись редакторъёс, критикъёс, эшъёс сяна вуизы авторлэн анай-атаез но. Кыӵе соос данъясько Маринаен! Шумпото со понна, пичи дырез сярысь мадизы: огшоры нылаш со ӧй вал, мур ас дуннеын куддыръя улӥз. Малпаськыны быгатонлыкез кылбуран удысэ сое вуттӥз. Нош тунсыко малпанъёсты вольыт, чебер гожъян понна, поэтесса кылъёсын быгатыса шудэ но ритмика возе. Кылъёс пӧртэмесь, мон куд-огзэ ӧй вала, словарной запас Мариналэн зэмзэ бадӟым. Ритмиказэ пусйизы, ачиз но со паймыса шуиз: кылбуръёс, пе,  трос ӧвэл на, нош кырӟанъёс куд-ог соос вылэ гожтэмын ини.
Ӝытлэн пумаз атаезлэн но кыл верамез потӥз, дото сюлмаз пыриз та ваньмыз (атайёс шер верасько ук публика вылын). "Трос тодмотэм кылё кылбуръёсты кылдытӥсьёс, тунсыко малпанъёс уг шараясько,"- шуиз со. Одӥг адямилэн кылбурзэ лыдӟиз, кытын автор улон сярысь малпаське: адями парсь но ӧвэл, тылобурдо но ӧвэл - музъем но инбам вискын улэ...
Котькуд адями малпаське маке сярысь, нош кылбурасьёс гинэ кельтозы ас малпанъёсты кагаз вылын.

Марина Пахомова соос пӧлын.