"Профсоюзник"

Россиысь вань профсоюзъёслэн федерациез ортчытӥз "Профсоюзник" нимо ужрад. Ми кык нунал ӵоже лагерьын "Заря" улӥм. Школаын дышетскыкум, лагерьёстӥ ӧй ветлы, нош студент луыса, профсоюзэ пырыса, кутски (пичильтык реклама). :)
Озьы сельхозкаысь отчы ми мынӥмы ньыль кузя. Вуимы но тодматскимы ИГМА-ысь студентъёсын. Вань пырисьёс пӧлысь ми гинэ студентъёс вал, мукетъёс пӧртэм Иж, Глазов, Сарапул заводъёсысь ужасьёс. Ваньмы мед тодматскомы, милемыз командаосы люкизы. Тани, сиськеммы бере, ваньмыз кутскиз. Нырысь ульчаын эстафета вал. Собере корпусэ пыримы но отын пӧртэм конкурсъёсы пыриськимы. Эшшо профсоюз сярысь лекция кылзӥмы но ӝыт пала деловой шудонъёс вал профсоюз тематикая. Мон али гинэ рос-прос валай, ма со сыӵе профсоюз но малы со кулэ. Со, пе, ужасьёслэсь правоосты уте. Деловой шудонъёс бӧрсьы котькуд командалы сётӥзы задание: кыӵе ке темаез мукетъёслы тунсыко возьматыны. Милемлы шедиз тема "Профсоюз но льготы". Дасяськыны кулэ вал ӝыт но уйын, обедэ мукет нуналэ возьматыны итоговой концертын. Ми ваньзэ ӝытэ вуттӥм, нош кин ке уй ӵоже лэсьтӥллям. Одӥг команда воксё видео но лэсьтӥз. Нош ӵукна кулэ вал мӧзмыт лекциын пукыны на. Озьыен ми ваньмы ас дасям ужмес возьматӥмы но пумын награждение луиз. Ваньмызлы сертификат сётӥзы. Со сяна милемлы футболка, диск, флешка, блокнот но ручка сётӥзы.

Бертыны воксё ӧз пот. Ми сыӵе медикъёсын эшъяським, соосын тунсыко вераськыны. Ку соос милемлы медицина сярысь мадиллязы, мон валай, кыӵе мынам профессие мӧзмыт. Ма мон экономика сярысь вералом? Номыр но. Одӥг пол маке вераськыны кутским удмурт кыл сярысь. Кин ке вераз, со, пе тодэ куинь удмурт кылэз. Мукетыз кыӵе ке солэсь пӧртэм кылъёсты вераз. (кулэ вераны, соос удмуртъёс ӧвэл, Татариысь вуизы, Медакадемиын ваньмыз почти Татариысь но Башкириысь, пе) Нош мон блог удмурт кылын нуисько, шуисько. Малы, пе, со кулэ. Мукетыз солы шуиз: "Аслэсьтыз кылзэ вӧлмытэ ук". Шарит, однако.
Сыӵе соос медикъёс шуныт адямиос. Малы та ужрад кык нунал гинэ вал? Эх, коть эн бӧрды.

Пиналъёс понна

Огпол милям огъяулонниын ветлӥзы профсоюзысь студентъёс. Соос балезинской детдоме (яке удмурт сямен коркае, кытын уло анай-атайтэк кылем пиналъёс) мыныны дасяськизы, соин октылӥзы дӥсез, шудонъёсты но коньдонэз. Мынам потӥз соосын пиналъёслы ӟечбурез вайыны. Озьы мон пыри профсоюзэ.
Пиналъёс понна октӥмы олокӧня пакет арбериосты, старшакъёс пичильтык сценка дасязы но конкурсъёсты малпамы. Пиналъёслы кулэ вал станциосъя бызьылыны но заданиосты лэсьяны. Сценка пумын ческыт приз сётъямы. Соос но милемлы аслэсьтыз поделкаоссэ кузьмазы. Собере футбол эшшо шудӥм на. Тани бертон дыр вуиз.
Автобусын ми кырӟаса мынӥм вал но, кема дыр ортчытэк, ваньзы изиллям. Мыным потэ, нокинлэн возьматэмез ӧз пот, кыӵе секыт та поездка соослы вал. Нош иземзыя мон валай, что ваньмыз жадизы психологически нырысь ик шуыса. Мон но кыкнапала асме шӧдӥ: шулдыр вал вроде бы, пиналъёслы но яраз, нош вань та ситуация понна, анай-атайтэк пиналъёс будо шуыса, куректон сюлмам кылдӥз.

Пумиськон ӝыт

25 шуркынмонэ тренировка бере мыным кулэ вал бырйыны мыноно мировой экономикаез лэсьтыны оло пумиськон ӝытэ А.Г.Шкляевен "Сахаре". Нырысь ик, мон ноку ӧй вал таӵе мероприятиосын. А, вал. Пичи дыръям ми доры вуылӥз П.К.Поздеев, но мон номыре тодам вайыны уг быгатӥськы ни. Эшшо мон "Сахаре" пырыны нокызьы ӧйлась на, коть кӧня Ижын дышетскисько ини. Нош мировоез уйын лэсьтыны быгато. Озьы малпаськыса, мынӥ ӝытэ.
Вуи отчы. Сыӵе атмосфера классной, чебер арбериос. Сыло гинэ соос бедной студент понна трос. Ӧжыт дыр ортчыса, вуизы трос адямиос, ачиз А.Г.Шкляев но. Мон сое тодмай: гужем УдГУ-лэсь журналистикая факультетэ пырон понна, собеседование солэн ортчи. Озьы ми пуксим но кылзӥськыны кутским.
Та ӝытэ кулэ вал луыны писательлэн выль потэм книгалэн "Арысь аре" презентациез. Но ми сое ӧм на лыдӟе шуыса но вераськыны та сярысь ум быгатӥське, книга сярысь вал верамын та гинэ. Отын бичамын мукет кылбурчиослэн но писательёслэн улонысь учыръёс, кудъёсты А.Г.Шкляев ачиз адӟиз но пумаз вань библиография адямиослэн, кудъёс коть кызьы ке но удмурт культура борды йӧтскизы. Эшшо та книгаез поттон понна кулэ луиз люканы трос коньдон: укмыстон сюрс манет книгапотонни сётӥз, нош кызь сюрс - ачиз писатель. Советской Россиын эрик ӧй вал, идеологилы тупамон кулэ вал гожъяны. Зато коньдонэн кунмы юрттылӥз. Азьло писатель умой улӥз, Магаданэ ке ӧз сюры, пе. Нош али котьма гожты, но поттоно аслад коньдонэн. Нокыӵе поддержка литературалы ӧвэл. Нош малы ке со сяськаяське сё равно. Та интыын кин ке юан сётӥз: "Малы уг адӟиськы удмурт литературалэн сяськаямез?" Писатель шуиз: "Ужъёс трос вань, но соос поттымтэ. Адӟиськоды уг кӧня коньдон кулэ талы. Эшшо писательёслэн но кылбурчиослэн книгаос поттӥсько пӧртэм книгапотонниосын, соин соос куддыръя ышо. Кулэ одӥг серия лэсьтыны".
Ас сярысь но А.Г.Шкляев вераз. Дипломной ужзэ А.Платонов сярысь гожтӥз, пе, - кытысь ке со сярысь лыдӟыса, солы тунсыко потӥз та писательлэн творчествоеныз тодматскыны. Диссертациез но со сярысь гожтыны малпаз, нош дышетӥсез солы мукет темаез сётӥз: кызетӥ даурысь ӟуч литературалэсь критика. Собере А.Г.Шкляев удмурт литературалэсь критикаен но тодматскиз. Кузебай Герд сярысь но мон кӧня тодӥ! Со вань удмурт писательёс пӧлын самой вылӥсез. Дышетскиз Герд Брюсов нимо ВЛХИ-ын (Высший литературно-художественный институт). Та туж дуно опыт. В.Я. Брюсов, пе, самой культурной поэт нимаське. Герд аслэсьтыз калыксэ яратӥз но адӟемпотонтэм кариз нокин мукет кадь.
Тани А.Г.Шкляевлэн малпанъёсыз удмурт кылэз утён понна. Нырысь ик, ми ум быгатӥське калыкез кужымен косыны удмурт кылэз дышетыны, но ми быгатӥськом карыны озьы, чтоб кылмес гажазы. Эшшо быдэс газетъёс удмурт кылын тросгес кулэ лэсьтыны, а не вкладкаос гинэ. Али одӥг гинэ удмурт кылын газет вань (ёросъёс пӧлын), кудӥз возиське на В.Нуриахметовлэн энтузиазмен. Трос ӟуч пиналъёс тодо удмурт кылэз удмуртъёслэсь умойгес. Соин быгатӥськом лэсьтыны ӟуч пиналъёс пӧлын вожмаськон кылэз тодонъя.
Удмурт филология факультет сярысь. Со уг быры, нимыз гинэ мукет луоз. Нош нимыз ке мукет луоз, ӧжыт улыса ачиз факультет но ма понна ужа вунэтоз. Азьло, факультетэз кылдытыку ик, татчы бомба понӥзы: лэсьтӥзы кык направление - удмурт кылъя но литературая дышетӥсь но ӟуч кылъя но литературая. Озьыен тросэз мыно ӟучез дышетыны. Удмурт кылэз дышетон понна ӵошатскон ӧвэл, будыны кужмо специалист дорозь уг пот.
И эшшо. Мыным тунсыко потӥз таӵе факт.  Кылъёслэн писатель, журналист но критик пӧртэм валэктонъёс. Писатель но кылбурчи ужало вуоноез понна. Соин соосты улыку ӵемгес уг валало но дунъяны кутско бырем бере гинэ. Журналист наоборот кулэ гожъяны озьы, чтоб сое али улӥсьёс валазы. Нош критик ужа мед писателез но валалозы али шуыса.
Озьы мон туж пайдаё ӝыт ортчытӥ, нокыӵе туж тунсыко мировой экономикаен ӵошатыны уг луы! А.Г.Шкляев выль книгазэ милемлы сётӥз, автографен. Табере мынам вань нырысетӥ книгае автографен, и мон тодӥсько, мае коллекционировать каро)))

Гуртын

Играысь ӟуч эше туж яратэ "Любовь и голуби" нимо киноез учкыны. Отын гурт калыклэсь улонысьтызы трос серем учыръёс  возьматэмын. Одӥг пол со мыным шуэ: "Тӥляд гуртын улыны туж шулдыр иське. Малы мон Кабачигуртын ӧй вордскы."
Хм, малпасько, азьло озьы ик вал, дыр. Тани атай мыным куке мадиз вал сыӵе учырез. Солэн Андрей нимо выныз армиысь вуиз. Гуртын ваньмыз сое пумитаны потӥзы. Юизы соос, но эшез-бӧлякез сое ас дораз ӧтиз. Отын пукизы но ульчае потӥзы. Пельпумазы кутӥськизы но На-На группалэсь "Фаина" кырӟанэз кесяськыны кутскизы. Нош Андрейлэн эшезлэн туганэз Фаина вал. Со потӥз, соослы оплеуха сётӥз но собере ульчаын шыпыт луиз. Мукетсэ атайлэсь вынзэ Сашикез та ик Фаина мотоцикл гараже пыртыны куриз. Дядь Саша соку уг быгаты вал соин ветлыны, нош туж потэ вал. Озьы со пуксем но не отчы мынэм. Вуиз площадкае, кытчы кот дэремез ошыло. Нош отын керттэтъес керттэмын вал. Озьы со "бегун с препятсвиями" кадь но наоборот мынэ: йырзэ утьыса мыкыртэ керттэтъёс улэ но берен ӝутэ. Дугдыны уг быгаты.
Озьы вал. Нош али тросэз калык аспонназ улэ ини. Ӵошен шер огазеясько. Пичи пиналъёс но ичи шудо, ульча кузя калгыса ветло гинэ но контактын пуко. А может мон номырез но уг адӟиськы но уг тодӥськы. Озьы ке - туж умой.

Ӵуказе.

- Атай, тон мудрон адями,

Мон тонэ гажасько.

Пожалуйста, юртты мыным,

Мон туж курисько.

Сёт ответ юанъёс вылэ,

Кудъёс сюлмам кылдӥзы.

Пыдысь-йырозь, ку улэ

Соос пушкам вӧлмизы.

Тани мынам малпанъёс,

Быдэстэм ужъёс но юанъёс.

Кылзы пумозь

Но сёт ответъёс.

Мон дышето куинь выль кылэз:

Немец, чех но китай.

Таӵе шуг-секыто малпанэз

Мон быдэсто ай.

Ӵуказе.

Ӟуч но удмурт книгаез мон гожто,

Сценарист но луо.

Блоге пайдаё запись пырто

Но комикс малпало.

Ӵуказе.

Анай мед туж ин шумпотоз -

Лэсьто ческыт пирог.

Чебурек пӧраны но луоз,

Огреч но лэсьто мон впрок.

Ӵуказе.

Мон КМС быгато лэсьтыны,

Шпагатэ но пуксьын быгато.

Каниськинаез луоз адӟыны,

Соин вераськын но луоз.

Ӵуказе.

Вуро дэрем льӧль малпанысь,

Кертто ыжгон носки.

Лэсьто поделка журналысь

Но колготысь чулки.

Ӵуказе.

Физикаез мон валало,

Историез дышето но тодо.

Вань литератураен

Семьяме тодмато.

Ӵуказе.

Нош кызьы быдэстын ужме, 

Кизили лыдлэсь ке со тросгес?

- Кулэ приоритет понны,

Малпан, ма дуногес.

Али тыныд  дышетскон кулэ,

Спортэн выроно но али.

Нош дышетны китай кылэз

Луоз ай пенсиын.

Дыред вань трос тынад,

Ӝог гинэ со кошке.

Пока тон малпанъёсад

Улӥськод, иське.

Кызьы дырез кутны луоз,

Куке вань малпанъёс

Уло ӴУКАЗЕын?!

Мын, султы, выр

Но трос ужъёс

Тон лэсьты ТУННЭын!

Озьы тынад сюресэд усьтӥськоз -

Тодод кытчы мыныны.

Мон малпасько, тынад ваньмыз пӧрмоз,

Уждэ гинэ кутскы быдэсъяны.

Вераськон.

-Песянай, мыным доклад лэсьтыны косӥзы улон сярысь Быдӟым Отечественной война дыръя, луэ-а тыныд юанъёс сётыны?

-Тон малпаськод, мон сыӵе пересь-а мар-а? Ладно, юа, мар потэ.

-Нырысь, кӧня тыныд арес вал но кытын тон улӥд война дыръя?

-Соку мыным вал укмыс арес и ветлӥ мон кыкетӥ классэ, нош улӥм Факел нимо поселокын.

-Кызьы кутскиз война?

-Радио пыр кылӥмы, гитлеровская Германия ми вылэ мынэ шуыса. Вань адямиос маке бӧрдо, бызьыло отчы-татчы, мужикъёс котомкаен кытчы ке кошко. Малы? Ма луэм? Маин кышкыт кыл - война? Сыӵе юан аслым сётъялляй. Собере мыным тае валэктӥзы, ачим но валай.

-Кызьы тон валад но шӧдӥд войнаез?

-Нянь ичиёмиз, милемлы 300 грамм анайлы, 200 грамм мыным сётъязы. Школаын ваньмыз "Мыным корочка, мыным корочка..." куро вал, малы ке шуоно со кемагес сииське. Гожъямы газетын печатной  строчкаос вискын. Колхозын ужано кулэ луиз. Озьы ваньмыз улӥзы, тон тае школаысь тодӥськод, дыр. Со шонер, озьы. Нош мадё мукетсэ. Мынам отчиме чорыгась вал. Со гуртэ чорыг вае вал но мыным тыбыр вылам керттэ сое. Нуы, пе, сое базаре, вуза но басьты сылал но аслыд маке но. Нош мон базаре вуылӥ, чорыгез ичи дуноен ӝоггес вузалляй, сылал басьялляй но гуртэ берттылӥ. Озьы улӥм. Отчим сярысь П.К.Поздеев гажаса кылбур гожтӥз. 

-Тау бадӟым, туннэ окмоз, дыр, малпасько.

тани дышетӥсь, гурт калыкен гажано адями, яратоно песянае Людмила Аркадьевна

тани мон, солэн внучкаез

нош тани баба Люсялэн отчимлы сӥзем кылбур

 П.К.Поздеев

Нодья

Быдӟым Отечественной война

      вакытысь мӧйы эшме, визь-кенеш

сётӥсьме Андрей Фёдорович

Леконцевез - Бадӟым Ондреез

буре  вайыса.

Шуре визнан чӧлтӥз Бадӟым Ондрей.

Вышкы зӧкта кыпы сикысь поттӥз.

- Уйлы нодья улӟытомы таре,

Вал возьманы кезьыт медаз луы, - шуиз.

Зӧк кыпызэ куштӥз Бадӟым Ондрей.

Зӧк кыз доры дугдӥз. Курткиз кизэ.

Сылӥз. Могаз. Сике пыриз берен.

Кунултыса отысь ваиз эшшо кыксэ.

Бӧмъям кӧс силёме Бадӟым Ондрей

Кут нырыныз кыпы улэ донге.

- Выдтэт ӟечгес вӧлдӥм ке, сюй парен,

Пие, - шуэ, - уйбыт ум шокалэ шуген.

Тӥрлонысьтыз тӥрзэ Бадӟым Ондрей

Басьтэ но кык кыпыосыз шоры

Куалдытъяса кора тыллы котрет - 

Тӥр куараез шулдыр эктэ Лозо сьӧрын.

Корам гопаз тыре Бадӟым Ондрей

Чандырскыса палдэм шелепъёсты.

Сеньки тылын толло кӧс эгырез

Пелля но улӟытэ буртчин туй кильёсты.

Кык кыпыос вылэ Бадӟым Ондрей

Куинетӥзэ кымет выллем инъя.

Шуэ: вашкалаос кезьыт дыре

Нин кораку тазьы тылскылӥзы нодья.

Кыз выжые ладъя Бадӟым Ондрей,

Сайет но лыс вылэ выдэ чалмыт.

Нодья, - шуэ, - шунтэ вань мугорез,

Со югытэ сикысь уз лыкты тяпа пыд.

Нодья гома. Кӧлэ Бадӟым Ондрей,

Вӧтаз адӟе оже бырем пизэ.

Сьӧлтам валъёс ишко нордӥ куарез.

Шурын лэйка толэзь, горд бадяр куар музэн...

Далай ини кысӥз Бадӟым Ондрей.

Ӝужыт Эгра вырын со шып кылле.

Солэн нимыз, сюлмыз но визьбурез

Мынам малпанъёсам уло нодья выллем.

Лултыл

Мынам мылкыд то ӝутске, то усе. Куке потэ ваньзэсты ӟыгыртыны, а куке вераськыны нокинэн уг пот. Котыр адямиос влиять каро мон вылэ. Лултыл ӝуато. Со куддыръя туж урод, но куд-ог умой: медальлэн кык палыз. Соин, дыр, мон сюрисько тунсыко адямиос пӧлы котьку. Урод адямиосын ачим урод луысал. Инмар мыным юрттэ.
Тани мынам группаез ке кутоно. Отын вань нылаш, кудӥз быдэс дуннеез ворме шахматаосын. Котькытчы ини ветлӥз, Грециын, эшшо кытын ке вал шуиз. Мукет нылашкалэн контактэз воксё ӧвэл. Зато со тунсыко адями, кудӥз дырзэ интернетын уг быдты. Со яратэ волейбол шудыны, йырез поромытозь, ваньзэ вунэтыса. Мон но озьы ик. Тросэз английской кылэз дышето, Чехие мыныны медо. Мынам но потэ, быгато ке. Ваньмыз аспонназы сыӵе классноесь! Милям туж визьмо группа, вань дышетӥсьёс озьы шуо.
Эшшо студсоветын трос адямиосын тодматски. Кин ке чебер суреда, кин ке видео снимать каре, кин ке кырӟа, кин ке эктэ.
Нош тренировкаям кужмо эшъёс вань. Мон соосты гажасько туж ин.
Тани опять лултыл потэ, маке кароно, нош али уй, ньыль час ини)))
Вообще тодысалзы ке адямиос кыӵе соос аспӧртэмлыко классноесь, дунне шудо луысал, дыр, ваньмыз ас сюрестӥ мынысалзы.

Дыр ӝог ортче.

Гуртэ вуыку, амбарысь дӥськут утялтыны потӥ. Азьло мон отын шудыны яратӥлы вал. Отын трос тунсыко арбериос котьку шедьтӥсько. Тани али но песянайлэсь вуж дэремъёсэ адӟи. Пичи дыръям та дэремъёсты дӥсяны туж ин потэ вал, соос шыкысын кыллизы. Нош ку будӥ, соос мыным ӧз яралэ ини. Али мыняса тодам вайисько.
Тани табере соосты возьыны но уг поты ни, куштыны но жаль. Пинал дыры озьы кошке, вань вуж арбериосты куяськом ке. Ваньмыз выльме, туала кариське, нош мон валасько, что будӥсько но бере сюрес ӧвэл ини.

Удалтӥз

Мыным выльысь огъяулонниын удалтӥз улыны умой адямиосын. Соос кыкназы Можгаысь: Вера но Аня. Анае Можгаысь ке, со туж шумпотӥз. Вералэн гуртэз анайлэн вордскем гурт вӧзын ик. Анай пичи дырзэ тодаз вайиз. Солэн гуртэз быриз ини, отын нокин уг улы. Монэ отчы нуыны медэ, возьматыны. Нош Аня биатлонистка. Ми ог-огмес валаськом))  Милям вообще шуныт обстановка. Мукет комнатаосын правилаос гожтэмын, нош милям самосознание.
Али пукисько огнам. Нылъёс гожтэм сярысь номыре уг тодо. Куке лыдӟозы ке, мед тодозы, кыӵе соос мыным дуно эшъёс луиллям. Вера Анялы валэктоз, дыр. Со уг вала удмурт кылэз, нош Вера мон кадь - вала, но уг вераськы.
Табере дышетскыны мыно. Кулэ уг куке но кутскыны)

Студент!

Тани туннэ 18 куарусён ини. Уй. Дыр ортче ӝог. Огъяулонниын улон мыным кельше ини. Нылъёс умоесь, сиён монэ пӧраны дышето. Ог-огмылы домашка лэсьтыны юрттӥськом. Школаын дышетскыку малпасько вал Ижын котькытчы ветло: эктыны, тренировкае, студ.советэ пыро, эшшо мукет пӧртэм ужъёс лэсьто. О-о, дыры воксё ӧвэл! Тани татчы пичи заметка но гожтыны уг ваньмиськы. Ку таӵе ритмез куто ини, уг тодӥськы.
Толон но туннэ - кык нунал - милям посвят вал. Толон экономистъёс пӧлын гинэ вал, старшакъёс милям самой классноесь, тунсыкоесь, олома но лэсьтӥзы. Концерт ми возьматӥм, собере испытаниос вал но дискотека. Нош туннэ электрификация факультетэн ӵош лэсьтӥзы. Соослэн трос пиос, нош милям трос нылъёс, пе, соин. Концерт но дискотека гинэ вал, тунсыко ӧвэл. Озьы мон студент луи. Татын мыным шулдыр. Али турслёт ортчиз эшшо на. Но со сярысь туннэ уг гожты, жади туж ин. 

Отработка

Сельхозакадемие пыриськыса, мыным отрабатывать кулэ луиз. Шедьтӥзы конечно "бесплатная рабсилаез". Озьыен мон мынӥ Ижкаре быдэс арнялы.
Кык сумкаосын, пакетэн вуи мон Центральной автовокзалэ. Отысь автобусэ пуксьыса, остановкаме ӧй шедьты, берыктӥськи троллейбусэн. Озьы калгыса укмыс часлы ӧй вуы но номыре ӧй кылы ма ректор вераз. Кыӵе ке но группа доры султӥ но соосын мынӥ огъяулонние. Вуим. Комнатаын но быдэс огъяулонниын вань агрономъёс вал, нош мон экономист. Выльысь кытчы ке не отчы сюри. Но мед, зато агрономъёсын тодматски. Кыкназы ик удмуртъёс. Соос вӧсяськизы, пе, удмуртъёсын мед сюрозы шуыса. Озьы ми туж шулдыр улӥм, туж ин эшъяським та вить нунал ӵоже. Олома но ог-огмылы мадимы. Вань магазинэз "Всё по 39" басьтӥмы но, дыр. Тараканъёсты нырысетӥяз адӟи! Мон соосты мукетгес син азям пуктылӥсько вал. Эшъёс милям соос табере.
Нош отрабатывать кари мукет адямиосын. Комендантша сыӵе скромной экономистъёсты ӧз адӟылы на, пе. Ахах.
Мыным почти ваньмыз яраз. Коньдон гинэ ӝог быре. Кызьы ке озьы:)

Мон АтАн!

Мон анайлэн но атайлэн нылзы. Соос мынам самой самоесь! Атае зарни киосын, нош анае зарни сюлэмен. Гужем мон ноку но соосты коркаын уг адӟиськы: то бакчаын маке каро, то пудоос дорын, то эшшо кыӵе ке уж шедьто. Нош толалтэ анае шутэтске, нош атае лыдӟиське.
Со туж ин лыдӟиськыны яратэ. Серьёзной но визьмо со мынам. Шуыны быгатӥсько, что мон "папина дочка". Пичи дырысеным сё атайлэн быжыз кадь ветлӥ. Со монэ котьмалы дышетӥз: инбамысь созвездиосты уйин потылӥм учкын, математикаез валэктэ вал, кортӵогъёсты шуккылыса ветлӥ. Одӥг пол шкафе ӧй вал но, ачим лэсьтыны малпай. Только сое атае коркае пыртыны ӧз лэзь малы ке, буёлэн но кари вал но. Ахахах. Отын табере пӧртэм инструментъёс кыллё. Кылем арын выль гараж пуктӥ, атае юрттӥз пичильтык. СССР сярысь олома но маде, соку, пе, умойгес улӥзы, надёжно, адямиослэн совесть вал, коркаез пытсатэк кельтыны луэ вал, например. Эшшо трос вераськыны уг яраты, по делу гинэ, мон но озьы дыши. Олома но ческыт пӧра на.
Анае нош самой шуныт,самой небыт, ненег но сюлэмо адями быдэс Музъемын. Со пинал садын ужа. Отын вань пиналъёс но соослэн анай-атайёс сое ярато сямыз понна. Анае монэ литератураез гажаны дышетӥз. Со школаын туж сое яратэ вал, али но кылбуръёсты наизусть лыдӟыны быгатэ. Синъёс ик ӝуаны кутско. Есенин - яратоно кылбурчиез. Куддыръя пиналъёсты кӧлтэ Пушкинлэсь "К морю" кылбурен. Монэным сочинениосты азьло гожтэ вал. Нош шыдъёс но выпечка ческытгес нокинлэсь ӧй сиы на.
Мон самой пичи нылзы. Эшшо апае но агае вань. Мон али дышетскыны кошко ке, огназы ини кылёзы. Азьло туж ин кошкеме потэ вал, нош али валай, что мон анай-атайтэк кема уг быгаты. Соин кыдёке ӧй кошкы, Иже гинэ. Вот, малпасько, быгатысал ке коркамес академия доры омыртӥ нуыны, кыӵе умой луысал. Али поступление дыры вал. Анай каждой нунал новостьёсты юаса улӥз, нош атай ваньзэ пушказ возиз. Ужез гинэ уг мыны вал. Мон валай, со но переживать каре. Али тодмо ини поступить кари шуыса, мылкыдзы но адӟиське ӝутӥськиз. Сыӵе мыным соосты шумпотэме потэ, ачим но шудо луисько мынясь бамъёсты адӟыса.

Удмурт кыл

Туннэ адӟи контактысь Юмшан группаысь комментариосты постлы мынам блоглэсь ссылкаен. Споръяськон кылдэм.  Отысь мон валай гинэ, что кин ке малпа удмурт кылэз ваньмыз тодыны кулэ, нош кин ке вера Удмуртиын трос национальностьёсъс уло но удмуртъёс толерантнойесьгес луыны кулэ.
Мон сярысь Удмуртиын улыса удмурт кылэз уг тодӥськы ке, номыр но кышкытэз ӧвэл, сюрес удмурт культураез рос-прос валаны но адӟыны пытсамын гинэ луоз. Валамед потэ ке - дышеты. Малы удмуртъёс берыктозы тыныд ваньзэ? Ачид йырдэ тӥяса словарен пукы. Мон валасько, выль кыл секыт дышетыны, соин пичи дырысь пиналъёслы возьматоно солэсь кулэлыксэ. Мон школаын ӧй дышеты ке, али мыным секыт луысал, дыр. Среда но лэсьтоно: мон анай-атаен вераськонэз котькуд нунал кылӥсько. Правилоосъя шуг дышетыны. Соин пӧртэм курсъёс пайда сыӵе уг ваё. Куное ветлоно зэм но, кинлэсь ке лыдӟи вал.
Милям школаын ньыль класс параллельын дышетске вал, "а" класс удмурт кылэз дышетэ. Озьы укмысэтӥ класс дорозь. Та школаын но гуртъёсысь школаосъёсын гинэ удмурт кылэз дышето милям Играын. Нош малы ГИНЭ? Со туж умой ини. Али воксё быдэс параллель витетӥ классысь кутскыса дышетэ ини. Сыӵе лэсьтӥзы.
Уг тодӥськы ма карыны адямиослы кин воксё уг тоды удмурт кылэз, туж тыршыса, дыр, пуконо но вань правилоосты но кылъёсты дышетоно. Нош трос сыӵеос вань, кудъёс мон кадь тодо, валало удмурт кылэз, но уг верасько, шугъяськисько. Соос понна мон сыӵе проектъёсты арт-экспедиция кадь тросгес лэсьтысал, малы ке шуоно со удмурт культураез вань палысен возьматэ: суредаськон, кырӟан, фото-видео, литература. Котькуд адямилы кыӵе ке удыс одно ик яралоз, тупалоз. Маке выльзэ со сярысь тодыны потоз но мон кадь мылкыдалозы. Али мыным потэ кыӵе ке выль дунне усьтӥськиз кадь. Нош самой умой - со пинал дырысен дышетскем. Правилоостэк, огшоры вераськон кылзыса, сюлэмен шӧдыса.
Эшшо вераме потэ, пиналъёслы кыӵе ке удмурт кумир кулэ, мед сое гажалозы но данъяськозы удмурт кылэз дышето/тодо шуыса. Ачим тодӥсько, асьме арлыдъёсы пиналъёс чурытгес, умой-а урод-а адями уг учко, крутой луоно гинэ. Милям параллельмы милемыз "деревня" шуылӥз. Соин ми возьдаським. Нош кыӵе умой адямиос монэным дышетскизы. Куке "недеревня" валалоз, дыр.
Мон уг вераськы, что котькудӥз кылмес тодыны кулэ, но гажанэз мед луоз.

http://www.minnac.ru/minnac/info/13840.html  тае татчы кельто,медам ышы, дыры луиз ке, кылзо ай)

ЮР-ЯР 2014

Али бер ини гожтыны Юр-Яр турслёт сярысь, со 26-27 пӧсьтолэзе вал, нош мынам уг поты сое вунэтэме, соин татын мед малпанъёсы кылёзы.
Турслёт ортчиз Шарканын. Мон отын ноку но ӧй вал но ӧй тоды, что та музъем вылын самой чебер кыз быдэс Удмуртиысь будэ, соин ик Тол Бабайлэн корказэ отысь шедьтӥзы. Та корка дорын ик бивуакъёс лэсьтӥмы. Визитка учкон кутскыку, милемыз ачиз Тол Бабай пумитаз, только солэн тушез зэмос ӧй вал. Гужем нуллыны пӧсь дыр сое:) Визитка ортчем бере, ми турполосае дасяським. "Со туж секыт луоз, эскерисьёс уз жалялэ" - кышкатӥзы милемыз. Мон шуо - самой секытэз вал гурезьёсты бызьылыны.. нош пиослы монэ медицина бӧрсьы секыт нуллыны. Мон шумпотыса но соосты жаль потыса носилкаын мынӥ. Эшшо ӧжытак ӧй уси на. Дас пол. Озьы ури-бери ми лыктӥм препятствиос нимо пунктэ. Одӥгез соос пӧлысь вал забор вылтӥ тэтчон. Дас одӥг пол со вылэ тэтчаме бере, уськыто, тӥяло сое, киосме-пыдъёсме чигто, атомной война лэсьто, Музъемез зуркато дыр ини малпай. Нош кызьы ке тэтчи. Кичабонъёс мыным:) Собере милемлы кытчы мыноно азимут вераса возьматӥзы. Сю градуслы янгышазы! Озьы ми нюлэсысь гурт доры вуим вал ини но ачиз эскерись милемыз шедьтӥз. Котькуд турполосаын вань нюр инты ортчон. Обычно со одӥг доска вылысь мукет вылэ выжон, нош али зэмос нюрвыл вал. Таиз туж кышкыт азьло потӥз, нош кӧня эмоцияос милемлы сётӥз! Эшшо шур вамен вброд мыноно луиз. Ми бивуакын пукыку ини мукетыз команда чорыг отысь кутӥз, йыр вылын шонаса мынэ вал. Нош берпуметӥ испытание - эгырлэсь костёр ӝуатон. Вань турполоса ӵоже ми котелок тылэсь эгырен нуллӥмы. Наконец со кулэ луиз. Озьы ми турполосаез ортчим. Нош табере комиссия пумитаны дасяськоно вылэм. Ми кылем арын кадь выльысь ӧм вуэ но милемыз витёно луиз. Соослы ваньмыз яраз, сиён кытчы ми понӥмы сяна. Музъем вылын со шуизы, коть со хозпалаткаын но клеёнкаын вал. Мыӟат палаткалэн потолоказ ошом. Ӝытазе выль ӵошатскон вал: турпесня кырӟазы. Тунсыко однако. Уйин мыным правда кӧлыны ӧз сётэ - гитараен шудӥзы, зато шулдыр вал, куноос но кыӵе ке ветлӥзы кылӥ. Кыкетӥ нуналаз футбол шудӥм. Асьмеос асьмелы ик куинь гол пыртыны шедьтӥм, ну чок ини, кудъёс-мукетъёс воксё нокинлы но, асьсэлы но пыртыны ӧз быгатэ. Сиён пӧраку котелок шыдэн музъеме усем, Лилиана Всеволодовнамы кытчы ке кошкиз вал но.
Уж емышъёсты витьыку, мӧзмыт луиз милемлы. Соин ми шудӥмы пыдъёс нимо шудонэн.
Озьы улыса гуртэ бертыны потӥз но ми каллен мынӥмы ини, емышъёсты тодытэк. Али мон эшшо на уг тодӥськы сое, тунсыко ӧвэл. Шулдыр вал - со важно.

Арт-экспедишн.

Ми доры Кабачи гуртэ 30-31 пӧсьтолэзе вуылӥз арт-экспедиция нимо проект. Отын ортчытӥзы пӧртэм мастер классъёсты: актер шудон, суредаськон, стрит-арт но мукет. Литература но блог лэсьтон ӵош вал, малы ке шуоно пиналъёс ӧз окме - тросэз кошкизы актеръёс доры. Мыным пичи дырысеным яра вал гожъяны сочинениосты, статьяосты милям районкае. Ӟуч кылын блог нуэме но вань. Соин мыным удалтӥз, та удысъёс ӵош луэмын шуыса.
Милемлы мадизы ма со сыӵе вообще блог но кызьы сое усьтыны. Малы со именно удмурт кылын мед луоз? Сое тодосчиос учко но асьме кылмез эскеро! Библиотека но табере нуэ аслэсьтыз блогзэ. Та сяна, мон тодматски тунсыко адямиосын, кудъёс одӥг интыын уг пуко, котьку дышетско, выльзэ усьто. Эшшо шумпотӥ мон спортэн вырисько шуыса - шедьтӥ адямиез, блоггерез, ми на одной волне шуом-а мар-а. Тае мон солэсь блогзэ лыдӟыса валай. Жаль трос вераськыса ӧм быдтэ. Малы мон сыӵе востэм? Бесит!
 Нош актёръёс одӥг нунал ӵоже гинэ сыӵе чебер постановка пуктӥллям. Киосын номер но акробатика туж мыным яразы. Асьсэос щепкинъёс но возьматӥзы программазэ, ми сыӵе гойым ук! А кырӟасьёс. Чипчирган ансамбльысь нылашъёс тодматӥзы милемыз кырӟанъёсын пӧртэм культураосысь, кыӵе усто кылӥськиз кык куараен кырӟамзы! Нош мон ӧй малпа вал, что ныл, кудӥз нуэ суредаськонэз, эшшо сыӵе кырӟа на. Собере гинэ, выльысь плакатэз учкыса, тодмай сое. Стрит-арт но тунсыко лэсьтӥллям: огшоры суредъёс гинэ ӧвэл, удмурт писательёслэн но кылбурчиослэн туспуктэмъёс! Пӧртэм фенечкаос, кулонъёс, монистаос лэсьтӥм эшшо на. "Пузкар" фильм но учкимы, со бӧрсьы фаер-шоу вал. Ух! Мынам адӟылэме ӧй вал на сое сыӵе матын. Таре тунсыко тодыны, мае юоно тыл поттон понна?
Ваньзэ сурай ини, ма нырысетӥ нуналаз вал, нош мар кыкетӥяз, ну и мед - озьы со мынам йырам кылиз.
Мон сыӵе шумпотӥсько али (именно али гинэ малы ке) удмурт кылэз тодӥсько шуыса! Азьло малпасько вал со вылын пересьёс гинэ верасько, нош та нуналъёсы адӟи кыӵе мынам анай кыл чебер. Сыӵе эмоциональной подъём вал на эшшо, ку ми кыӵе ке мероприятие Кузебай нимо гимназие ветлӥмы но юр-яр турслётъёсын. Соос бӧрсьы удмуртэн вераськыны туж ин потэ. Мон котьку асме патриот кожасько вал. Россиялэсь патриот вылэм гинэ, аслам пичи Родинаме воксё вунэтӥ. Арт-экспедициысь адямиос синъёсты мыным усьтӥзы. Табере мыным но потэ удмурт кылэз вӧлмытыны но вань адямиослы солэсь чеберзэ возьматыны.
Туннэ мон кутски нуыны блог удмурт кылын. Со нырысетӥ вамыш луоз. Льӧль малпанам вань книга гожтон но сценарий удмурт фильмлы. Кырӟасал но дыр, одӥг пол витетӥ классын клубын нырысетӥ куплетэз кык пол кырӟай, но со дырысен сцена вылэ уг потӥськы ини. Ахахах!
Экспедиция таре кошкиз мукет ёросъёсы, нош кӧня егит сюлэмъёсты со татын ӝуатӥз, малпасько.